هلا شباب هلا بنات

هلا شباب

المحترم المتواضع القنوع

متواضع بكل شي حنون يخاف الله بكل شي يقوله و يسويه يعرف اشلون يحترم نفسه ويحترم اللي في البيت ويحترم البشر برع البيت ، أسلوبه روعه يقتنع بالشي اللي عنده وغالباً ما تكون عيونهم حلوه
يجذب الناس بروحه الحلوه الطيبة المرحة وطبعا مهب قله في مجتمعنا والله يزيدهم انشاء الله قولو امين .

اللامبالي

تلقونه في البيت ومع اهله غير وامخيس النفس ومهب مهتم في البيت ولا في احد ومطنش وبرع مافي احسن منه ما ادري ليش يمكن شي نفساني ؟؟ مثال
يافلان قم ود أختك المستشفى تراها تعبانه يقول هاه وش فيها مافيها إلا العافية عطوها بندول اكسترا بس اذا واحد من ربعه تعبان يقوم يطير طيران علشان يوديه المستشفى بعد يعشيه على احسابه .

مهوووووس رياضه

الكشخه زيروووو يعني لا تحلمون اتشوفنه كاشخ بيوم من الايام ترى ما يلبس غير ملابس الرياضه غالبا ما يكون عنده كرشه من يلسه التلفزيون و شوفه المباريات لانه ياكل وقت المباريات وعادي يشوت اللي احذاه بين وقت والثاني ترى متأثر بالمباراة

الكسول

وياكثرهم هالايام يوم يكون في المدرسة كسلان وكله شردات وهواش ويكبر ويشتغل ما يبدع في شغله واذا راح السوق مع اهله ما يشيل عنهم شي وراه هالفقيره الضعيفة تسحب أكياسها الوحدة تشوف المصريه واللبنانيه تحسدها على الذوق اللي عند رجالهم ما يخلونهم يشيلون شي.

الفوضوي الغير المرتب


تبي تعرفونه شوفوا سيارته
تجيك السيارة وصخه كلها غبار من يوم شراها ماغسلها لا ويقول هذي غبار الوكالة أمحق وكاله لاوكاله ولازفت الاعاجز يغسلها لا واذا شفتها من الداخل ماتدري وين تحط رجلك من هذي فروة تحت رجلك واسلاك وقراطيس ومناديل واتستكانات الشاهي لها سنه بالسيارة وبلاوي كل وصاخة الدنيا داخل السيارة .

الدلـــوع

بنت تدلع معقوله تنبلع بس ولد يتدلع اخ صج قههههههههر
تشوف راسه ماتدري هو راس بنت والا ولد تسريحات ما أدري من وين يجيبونها اللي فالق راسه من النص تقل ثور واللي مسويلي تسريحة بطل التيتانيك وهو يشبه غاندي ، مايدرون ان الشماغ والغترة أستر لهم والله ان وسامتهم وحلاوتهم بها الشماغ اللي تستر على بلاويهم .

العصبي

وهذا مسوي فيها عاد انه شخصيه يدخل ينفخ ويطلع ينفخ يدور المشاكل دواره يحسب ان بأسلوبه هذا يخوف الناس مايدري ان النوعيه هذي يكون بداخله انسان ضعيف ، واكثر ما يعصب على اهله لانهم يستحملونه وعارف لو برع بينرضخ .

المغرور

بعضهم شايف نفسه على ايش شين وقوة عين
وأغلب اللي كذا يحس بالنقص ومن زود إحساسه بالنقص يحاول يرفع نفسه عن الناس وما يدري ان من تواضع لله رفعه

راعي الاستعراض والتحفيص او تفحيط

هذا اذا فتحنا راسه تلاقي مخه تقل جريش من كثر ما يفتر بها الشوارع لا يفهم ولا يدري وين ربي حاطه ماعنده ما عند جدتي وملعوز الدنيا ومخرب سيارات بيتهم ومخسر ابوه وكل يوم طالبينه الشرطة .

الطربان

وهذا ما يجلس بدون مسجل في غرفته الاستريو يشتغل على أعلى صوت قمة في الإزعاج وإذا طلع بسيارته الله يعين المسجل لا ومركب سماعات زيادة علشان يطلع الصوت صح اذا وقف عند الاشارة شوف ملامح وجهه متشقق من الفرحة كأنه مسوي انجازدولي .

المرقم

هذولا ساكنين بالسوق ما ادري ماعندهم بيوت تشوفهم 24 ساعة بالسوق وطابعين أرقامهم ماليين كرتون ويالله توزيع حتى بعضهم يحذف الرقم على شغالات وهم مايدرون تروح توري كفيلها الرقم شوف شوف بابا هذا هديه .

العنيد

هذا ماتقدر عليه يموت بالعناد تجيه باللين يعاند اكثر تجيه بالعين الحمراء يمكن يكسر راسك وهذا ينفع معه المثل ابعد عن الشر وغني له

الحساس

وهذا واحد بالمليون تحتاج ميكروسكوب علشان تدور عليه بس اذا لقيتوه لا تفرطون فيه لأنه ينشرى بالملايين .

أبو وجهين

هذولا من اللي ياجرون سيارات الجخ والكشخه اللي انعرفها
وان وقفته قال انا فلان بن فلان آل .. وهو تلقاه سلتوح مايدري وين الله حاطه ولا إذا وقف عند الإشارة وأنت جمبه رافع كتفه ونافخ نفسه وإذا كان اللى واقف جنبه جمس فيه بنيات محترمات أرقبته شوي وتنكسر وهو يناظر فيهم ويطلع هلمعروض الرقم ( بس يكون بخط كبير ) وحالته حاله ولا تلقاه مأخذ سيارة رفيجه غصب .



هــــــــــلا حريم


البنت العنيدة

همها تكون شديدة وكل من يقابلها بتلوي أيده ومن يطاوعها تزيده
ومن تطيعه هذا عيده تعاند نفسها حتى لو عاشت وحيدة.

البنت الثقيلة

هذي قليلة نظراتها تطرح قبيلة ومن تعجبه مسكين ياويله
تعطيه وجه؟ لا مستحيلة ما ينفع معاها مليون حيلة
دايم رزة ومو طويلة؟؟

البنت القصيرة

هذي كثيرة وطبعها داهية وبصيرة دايم لسانها طويل
وخطيرة لو هي حرمة او صغيرة صوتها يرعد في ديرة
البعد عنها تراه خيرة..

البنت الثرثارة

ياهي بربارة وفيها بثارة ليمن حكت ما توقفها إشارة تحكي في كل شي
وفي أي عبارة تفهم في الطبخ في الموضة وفي الإدارة حتى في فن العيارة..
دبه تزعجك تمرضك تجيب المرارة.

البنت الفتون

عليها عيون تجيب الجنون وجهها يحرك شجون ويتعب قلوب وظنون
كل يبيها له تكون مادروا انها من الداخل فراغ وسكون مادروا انها صورة للنظر
بس بالعيون..

البنت اللعوب

تسحر قلوب تلعب ولا يمكن تتوب تخدع وتخفي كل عيوب عشاقها واجد طلوب
ترمي وتضيع في الدروب بين الشباب اتسبب حروب.

البنت القبيحة

ياهي جريحة دايم صريحة واطباعها طيبة ومريحة ماتحب كثر الظهور
تخاف الفضيحة تبي معجزة وتكون صحيحة تغير ملامح وجهها..
واتصير مليحة .

البنت الغبية

دايم غنية استيعابها بطيء شوية مرة تحكي لبناني ومرة بدوية فيها سذاجة
وعفوية لا هي ضعيفة ولا قوية ماشية بس بالنية.

البنت المغرورة

هذي مشهورة ما تراعي لأحد شعوره بس غلاف أو مثل صورة من كل زينة
هي غيورة تبتسم مجاملة أوللضرورة من كل شي مقهورة دايم تقول: انا مسحورة..


تحياتي
بسمه
ياربي تعجبكم

المرقم

هذولا ساكنين بالسوق ما ادري ماعندهم بيوت تشوفهم 24 ساعة بالسوق وطابعين أرقامهم ماليين كرتون ويالله توزيع حتى بعضهم يحذف الرقم على شغالات وهم مايدرون تروح توري كفيلها الرقم شوف شوف بابا هذا هديه .

هههههههههههه
بس بسومه الحين صار العكس البنت الي ترمي رقم

خخخخخخخ

ومن حركات الرجال اذا شاف بنت يسوي حاله يعنيني يتكلم في الجوال


خخخخخخخخخخخخخخخخ


احلى مرور يالدلوعه